Улаанбаатар хотын төвийн зургаан дүүргийн хэмжээнд сайжруулсан түлш борлуулах 359 цэгт хийсэн шалгалтаар зарим дүүрэгт хангамж хангалтгүй байгаа талаар Нийслэлийн орчны бохирдлын газраас мэдээллээ.

Шалгалтаар Баянгол, Хан-Уул дүүргүүдийн түлшний хангамж хүрэлцээ сайн байсан бол Баянзүрх, Сонгинохайрхан дүүрэгт шахмал түлш борлуулах 30-40 цэг тогтмол түлшгүй байдаг бөгөөд өдөртөө ирээд хурдан дуусдаг 50-60 цэг байгааг илрүүлжээ.

НОБГ-ын урьдчилан сэргийлэх хэлтсийн дарга, хурандаа Г.Нэргүй “Иргэд шахмал түлш хэрэглэж сурсан байна. Харин иргэд захиалсан түлш хугацаандаа ирдэггүй, өдөртөө ирээд дуусдаг, зарим цэгт түлш байдаггүй гэсэн шаардлагууд тавьсан. Үүнд онцгой комисс анхаарч ажиллаж байна. Өнгөрсөн амралтын өдрүүдэд Нийслэлийн яаралтай түргэн тусламжийн төвд угаарын хийд хордсон гэсэн найман дуудлага ирсэн.  Дуудлага өгсөн иргэдэд гэрээр эмнэлгийн тусламж үйлчилгээ, зөвлөгөө өгсөн. Насанд хүрсэн нэг иргэн хэвтэн эмчлүүлж байна” гэлээ. Мөн Цагдаагийн ерөнхий газрын Нийтийн хэв журам хамгаалах, олон нийтийн аюулгүй байдлыг хангах албаны Хүрээлэн буй орчны хяналтын хэлтсийн алба хаагчид болон Нийслэлийн мэргэжлийн хяналтын газар, Нийслэлийн онцгой байдлын газрын алба хаагчид шалган нэвтрүүлэх долоон товчоонд 24 цагаар үүрэг гүйцэтгэж байгаа юм. Ажлын явцад өнгөрөгч амралтын өдрүүдэд 33 тээврийн хэрэгслээр 993 тонн нүүрс дамжин өнгөрсөн бол зөвшөөрөлтэй 2136 тонн нүүрс дамжин нэвтэрсэн. Зөвшөөрөлгүй түүхий нүүрс нэвтэрсэн гэх зөрчил илрээгүй байна.