Өнгөрөгч бямба гарагт 49 настай нэгэн эр шатахуун түгээх станцаас пиво авах гэж очоод маскгүй хүнд үйлчлэхгүй гэж хэлсэн ажилтныг буудан хөнөөжээ. Тухайн үйлчлүүлэгч ШТС-д хагас цагийн дараа буцан очин дээрх хэргийг үйлдсэн байна. Гэмт хэрэгтэн нь хэргийн газраас зугтсан ч Ням гарагт хэргээ өөрөө хүлээсэн байна. Тэрбээр мэдүүлэг өгөхдөө “Уураас болж гаргасан үйлдэл” гэжээ. Цагдаагийн газраас “Тэр байцаах явцад халдваргүйжүүлэх  дэглэм дагахаас татгалзсан” гэж мэдээлжээ.

Тус улсад хөл хориог маш хүндээр хүлээн авч, эсэргүүцдэг бүлэг байдаг тул энэ нь улс төрчдийн анхааралд өртөөд байгаа аж. Германы Querdenken хөдөлгөөн нь маск, вакциныг эсэргүүцдэг мөн хуйвалдааны онолчид болон экстремист консерватив хүмүүсийн нэгдэл юм. Facebook-ийн зүгээс тус хөдөлгөөнтэй холбоотой 150 гаруй хүнийг буруу, худал мэдээлэл тарааж үймээн самуун дэгдээх эрмэлзэлтэй гэсэн үндэслэлээр хаягуудыг нь хаажээ. Эрх баригчдын зүгээс гэмт хэрэгтэн нь тухайн хөдөлгөөнтэй холбоотой эсэхийг зарлаагүй ч, тус бүлэг нь том хэмжээний олон бослого зохион байгуулсан тул батлан хамгаалах байгууллагуудын хараа хяналтад байгаа аж.

Ангела Меркелийг өв залгамжлахын тулд сонгуульд өрсөлдөж буй Анналена Баербок твиттер  хуудаснаа “Хүчинтэй хуулийг дага гэж хэлснийхээ төлөө амиа алдсан залуу хүнийг сонсоод цочирдож байна” гэж жиргэсэн бол Ангела Меркелийн Христийн ардчилсан холбоо намын Ерөнхий нарийн бичиг  Пол Зиемиак хэлэхдээ “Маск зүүх шаардлагатай гэж хэлснийхээ хариуд залуу хүн зүгээр л   цаазлуулчихлаа. Байж боломгүй туйлшрал байна” гэж хэлжээ.

Эх Сурвалж: Fox News