Сүхбаатар аймгийн 80 жилийн ой болох гэж байгаатай холбоотойгоор дахиад нэг бурхны хөшөөний асуудал сөхөгдлөө.

Тодруулбал, Улаанбаатар хот дахь нутгийн зөвлөл нь Бурхан багшийн сэрэг дүр бүтээж өгөх санал тавьсан юм байна. Үүнийг нь аймгийн Засаг дарга М.Идэрбат идэвхийлэн дэмжсэн ч байсныгаа буулгаж, шинээр бариулахаар зүтгэжээ.

Тус аймаг руу орох хэсэгт байрладаг “Дөрвөлж толгой” гэх газарт уг нь Өэлүн эхийн хөшөөт цогцолбор байсан аж. Яг аймаг руу орд хэсгийн өндөрлөг тул иргэд нь түүндээ амарч, зугаалах, уран бүтээлчид ч уулзалт, ярилцлагаа хийх зэргээр 15 жил ашиглаж иржээ.

Тэгсэн эрхэм Засаг дарга М.Идэрбат нь “Өэлүн эх хөшөөт цогцолбор нь хуучирч муудчихсан оронд нь нутгийн зөвлөлийнхөн гоё хөшөө босгож өгөх нь” гээд “Дөрвөлж толгой”-г зааж өгөөд дотор нь байсан бүхнийг нүүлгэж, нурааж эхэлсэн байгаа юм.

Уг нь Өэлүн эх хөшөөт цогцолбор хүрээлэнгийн загварыг 2006 онд зураач Ё.Бадарч гаргаж хөшөөг нутгийн уран бүтээлч Ц.Энхтайван бүтээсэн бөгөөд түүнд О.Дашбалбар, Д.Нямсүрэн нарын шүлгээс сийлсэн, эв эеийн билэгдэл болсон бүтээл байсан аж.

Гэтэл шарыг харж шарвана, улааныг харж урвана гэгч болж, уран бүтээлчийн оюуны өмчийг хэл үггүй зөөж, суурийг нь трактороор түрчихсэн байгаа юм. Арга ядсан Ё.Бадарч зураач Урчуудын эвлэлд хандсан тухайгаа хэлж байна.

Харин Бурхны хөшөөний өмнө сөхөрсөн М.Идэрбат дарга “Манайх Өэлүн эхийн хүрээлэнг засварлах 500-600 сая төгрөг байхгүй. Тийм болохоор нутгийн зөвлөлийн Бурхны сэрэг дүр бүхий хөшөө барих саналыг хүлээж авсан. Биднээс мөнгө гаргахгүй. Өөрсдөө бүтээн байгуулалтын бүх зардлаа гаргана” гэсэн хэмээн хэнэг ч үгүй хариулж байна билээ.

Та ядаж өөр газар өгч болсонгүй юу гэхэд “Угаасаа аймаг руу орж ирэхэд хамгийн өндөрлөг аятайхан газар нь “Дөрөлж толгой”. Тэгээд ч өмнөх хөшөөг нь зөөгөөд өөр газар дахиад уран бүтээлчдэд зориулсан цэцэрлэгт хүрээлэн барина” гэв.

Хачирхалтай биш гэж үү. Байгаа хөшөөт цогцолбороо засч сайжруулахын оронд нутгийн зөвлөлөөс үнэгүй юм өгөх нь гээд буулгаж, нураагаад, дахиад өөр газар шинээр байгуулна гэж ярьж байна.

Энэ нь өөрөө ёстой ил цагаандаа хөрөнгө босгож, мөнгө угаах гэсэн шунал гэж харагдаж байгааг нутгийн иргэд ч хэлж байгаа юм. Түүгээр ч зогсохгүй нутгийн зөвлөл тухайн Бурхны сэрэг дүрийг бүтээхдээ тодорхой хувийг санхүүжүүлж, сумдаас үлдэгдэл хөрөнгө буюу 100, 100 сая төгрөг нэхсэн гэх мэдээлэл ч бий. Тийм байтал Засаг дарга М.Идэрбат төсвөөс л мөнгө гаргаагүй бол хамаагүй гэсэн шиг харалган шийдвэр гаргачхаад, түүнийгээ зөвтгөж онгирсоор байх уу.

Хүсвэл иргэд өөрсдийн хөрөнгөөр нэгдээд ч болов Өэлүн эх цогцолбороо засч, сэлбэж болох байсан тухай ч ярьж байгаа юм. Түүгээр ч зогсохгүй М.Идэрбатыг өөрийн нүглээ бурхны хөшөөгөөр цайруулах гээгүй л бол хэмээн халаглах хүн ч олширчээ.