Намбаярын Энхбаяр гэдэг хүнийг Монгол Улсын 3 дахь ерөнхийлөгч гэдгээр нь бас шоронд байхдаа  үүргээ гүйцэтгэж буй төрийн албан хаагч руу салаавч гаргаж, элдэв бусаар хэлж байсан “нөгөө хүн” гэдгээр нь  мэднэ.

Тэгвэл тэр өчигдөр олныг бухимдуулсан зүйл хийж үнэндээ л том толгойлов. Тэр тийм л том толгойтой, тийм л араншинтай хүн.

Товчхондоо бол тэр дахиад л чичирч эхэлж. Яагаад гэж үү?

Яагаад гэвэл “Урт шар дээлт”-эй байх үеийнхээ эрх мэдлээ санагалзсаар байгаа учраас тэр. Өмнө нь тэрбээр ийм үйлдэл гаргаж дэндүү даварсан учраас, дахин дахин даварсаар Дагва ахын толгой дээр бус Монгол төрийн толгой дээр гарч хаан суухыг санаархсан  учраас  хорьсон гэхэд үнэнээс хол зөрөхгүй.   

Тэгвэл өнөөдөр тэр Үндсэн хуульдаа гар дүрэхдээ бүр ханцуйгаа шамлаж байгаад бүр гүн гэгч нь дүрж Монголын ард түмнийг үл хүндэтгэв. Үүнийгээ “Би бол ард түмэн” гэсэн шигээ тайлбарлаж сууна.

Түүнийг дагаж  хэвлэлийн хуралд нь оролцогсод  бас ичгүүртэй. Богино өгүүллэгийн ном бичиж байгаа  юм шиг  2, 3 сар суугаад Эцэг хуулийг биччихдэг тэд үнэндээ хэн юм бэ...?

Үндсэн хуульдаа үе үе гар дүрдэг улс одоохондоо  Монголоос өөр  алга. Гэхдээ бүр сонгуультай холбоотой зүйл заалтаар “Тоглох” сонирхол нь  давамгайлчхаад байгаа нь ч нууц биш. Тэгээд ч “Ард нийтийн дунд санал асуулга явуулж байж шийднэ” гээд заачихсан байхад ингэж бүдүүлэг загнаж, ингэж чичирч болохгүй.

Үнэндээ бол  “Намбарын хүүгийн энэ үйлдлээс өс хонзон үнэртэж байна”  гэж харагдсан.

Тодруулбал  түүний  тараасан “Монгол Улсын Үндсэн хууль / төсөл/ гэсэн номын 50 дугаар зүйлийн 1-д “Шүүгчийг бүх насаар нь томилно” гэсэн  нь шазуур зууж, өс хонзон санаж гэдгийнх нь том илэрхийлэл гэж ойлгогдсон. Бас 35-ын 12-т байгаачлан “Ерөнхийлөгч байсан хүн өөрөө зөвшөөрвөл УИХ-д шууд сонгогдоно” гэсэн нь ч  бас  үнэндээ түүний  хэн бэ гэдгийг нь бүр ч гэрчиллээ. Мөн тэрбээр  Монгол Улсад суугаа Элчин сайдын яамдуудад өөрийнхөө хөрөнгөөр хэвлүүлсэн тэр номоо тараасан нь төр засаг хийгээд ард олноо басамжилсан үйлдэл байв.

Тэгвэл төр засгийн зүгээс “Шинэ Үндсэн хууль бичих захиалгыг эрх баригчид болон Засгийн газрын зүгээс өгөөгүй. Харин "улстөрийн намуудыг, Үндсэн хууль судлаачдыг оролцуулсан ажлын хэсэг байгуулж, бэлэн бичигдсэн байгаа 4 Үндсэн хуулийг нэмээд төр засагтаа танилцуулъя" гэдэг саналын үнд­сэн дээр Ерөнхий сайд захирамж гаргасан бөгөөд 1 нэг нам, эрх барьж буй намын Засгийн газар захиалаад батал­чихдаг  Үндсэн хууль гэж огт байхгүй” гэсэн байр суурьтай байгаа.

Тэгэхээр товчхондоо бол Намбарын Энхбаяр гэх энэ өвгөн өс хонзондоо хөтлөгдсөөр дахин ийнхүү чичирч эхэллээ.