“Скай Ресорт”-д найзуудын хамт гулгахаар явсан М.Ганбат залууд тус байгууллагаас  хамгаалалтын малгай, тохойвч, өвдгөвч өгөөгүйн улмаас гулгаж байгаад унахдаа тархиндаа хүнд гэмтэл авч, өнөөдөр хэвтэрт гэр бүлийнхнийхээ асаргаанд байгаа тухай өмнө нь бид мэдээлсэн.  

Энэ асуудал нэгэнт шүүхээр шийдвэрлэгдсэн бөгөөд “Скай Ресорт” компани хохирлыг бүрэн барагдуулахаа илэрхийлсний үндсэн дээр Өршөөлийн хуульд багтаж, ялаас мултарсан. Гэвч 3 жилийн хугацаанд хохирогчийг гадаадад эмчлүүлэх эмчилгээний зардлыг өгөөгүй, өмгөөлөгчийн төлбөр нэхэмжлэх мэдэгдэлд ч хариу өгөөгүй өнөөдрийг хүрчээ. Нөхцөл байдал нэгэнт ийм дээрээ тулсан тул хохирогчийн ар гэрийнхэн “Бидний дундах нэгний төлөө” ТББ-д хандаж, хандивын аян эхлүүлсэн. Ингэхдээ гэмтлийн шалтгаан нөхцөл, шүүхийн шийдвэрийг олон нийтэд танилцуулсан. Тэрхүү бичлэг цацагдсаны дараа иргэд “Скай Ресорт”-ыг хариуцлага хүлээхийг шаардаж эхэлсэн юм.

Харин “Скай Ресорт”-ын зүгээс хариу мэдэгдэл гаргасан. Тухайн мэдэгдэлд “Скай Ресорт” компанийн үйл ажиллагааны менежер С.Уянга хохирогч залууг монголдоо ганцхан байдаг Олон улсын итгэмжлэгдсэн эмнэлэгт хэвтэн эмчлүүлсэн тухай ярьсан. Энэ эмнэлэг нь “Интермед” бөгөөд М.Ганбат таталт өгч, биеийн байдал нь хүндрэхэд хэвтүүлсэн. Ингэхдээ хоёр хоног хэвтүүлээд гаргасан байдаг. Эмчилгээ дор хаяж 7-10 хоног хийгдэж байж тодорхой үр дүнд хүрдгийг хэн хүнгүй мэднэ.

Тэгвэл тус байгууллагынхан энэ мэтээр бусдад хандсан, одоо ч мөн дорд үзсэн, ихэрхэж дээрлэхсэн өнгө аясаар  хандаж  “эмчилсэн” гэж мэдэгдэх нь эмнэлгийн байгууллагын ёс зүйд хэр нийцэж  буй нь ч харагдаж байгаа юм.

Угтаа бол “Интермед”, “Скай Ресорт” хоёр нь MCS группын охин компаниуд. Эцэг нэгтэй тус компаниуд амь нэгтэй байгаа нь энэ гэсэн үг. “Скай Ресорт”-ын зүгээс ийм увайгүй үйлдэл гаргасан ч  хүний амь нас аварч, энэрч тэтгэх учиртай эмнэлэгийн байгууллагын хувьд  байж боломгүй үйлдэл.

Иймд “Интермед”-ээсч хариуцлага нэхье