Энэ сарын 19-21-ний хооронд Японы Хирошима хотод Долоогийн бүлгийн дээд чуулган болох бөгөөд уг уулзалтад Францын ерөнхийлөгч Эммануэл Макрон оролцсоныхоо дараа манай улсад айлчлах юм байна.

Тэрбээр 5 дугаар сарын 21-ний өдөр манай улсад газардах ба орой нь Монгол Улсын Ерөнхийлөгч У.Хүрэлсүхтэй хүндэтгэлийн зоог барих аж. Хоёр улсын төрийн тэргүүн “геостратегийн чухал асуудал” хэлэлцэх төлөвтэй байна гэжээ.

Түүнчлэн Францын талаас мэдээлж буйгаар “Хөрш орнуудаас хараат байдлыг сулруулж, Монгол Улсад нэмэлт боломж нээж өгөх нь энэ удаагийн айлчлалын үр нөлөө” гэдгийг онцолсон байна.

Харин Монгол Улсын хувьд хоёр улсын харилцааг ногоон эрчим хүч, зам тээвэр, эрүүл мэнд, хөдөө аж ахуй, соёл, боловсрол, хүмүүнлэг зэрэг салбарт тэлж, харилцан ашигтай хамтарсан төслүүд хэрэгжүүлэх эрмэлзэлтэй байгаа юм. Үүгээр ч зогсохгүй ам дамжин яригдсаар ирсэн "Атомын цахилгаан станц барих" эсэх асуудлаар хоёр тал хэлэлцэж магадгүй юм гэх хүлээлттэй байна

AFP