УИХ-ын 2024 оны сонгуулийн дараа хамгийн олон гишүүнтэй парламент бүрдэхээр болсон.

Тодруулбал, лхагва гарагт Монгол Улсын Үндсэн хуульдаа “УИХ нэг танхимтай, 126 гишүүнтэй байна.  УИХ-ын сонгуулийг холимог тогтолцоогоор явуулна. УИХ-ын гишүүний 78 нь олныг төлөөлөх, 48 нь хувь тэнцүүлэн төлөөлөх аргаар сонгоно” гэх өөрчлөлтийг оруулсан.

Тэгэхээр ирэх жил намууд тойрогт 78 гишүүнээ илгээх бол жагсаалтад 48 хүнээ “дархлана”.

Өнөөгийн эрх баригчдын хувьд тогтолцооны өөрчлөлтийг эхлүүлэхийн тулд санасандаа хүрч, ҮХӨ-ийг хийлээ, чадлаа. Гэвч баярлах болоогүй.

Өнгөрсөн 34 жилийн хугацаанд бий болсон, бугшсан, өдгөө нийгмийн бухимдлыг төрүүлж буй асуудлуудыг цэгцлэхээр тунхагласан. Холбогдогчдыг ч ил болгож байна.

Яг түүн шигээ, тэдэнд хуулийн дагуу, намынхаа дүрмийн дагуу хариуцлага тооцох ёстой.

УИХ-ын 2020 оны сонгуулийн өмнө ЖДҮХС-гийн асуудал үүсч, тухайн үед МАН-ын дарга байсан У.Хүрэлсүх нэр холбогдсон хүмүүсийг нэр дэвшүүлэхгүй хэмээж байв. Мэдээж бүгдийг биш ч гэлээ тодорхой тооны хүнээр “туг тахиж”, дүр эсгээд өнгөрсөн.

Харин энэ удаа нэгэнт Засгийн газраас 5 Ш хөтөлбөрийн хүрээнд олон асуудлыг илчилж байгаа учраас Хөгжлийн банк, нүүрсний хэрэг, Засгийн газрын тусгай сангууд, аливаа хууль бус болон ёс зүйгүй үйлдлээрээ нийгмийн бухимдлыг төрүүлсэн, тэдгээрт нэр холбогдсон хүмүүсээ ирэх сонгуульд нэр дэвшүүлэхгүй, тэр тусмаа жагсаалтын 48 хүндээ багтаалгүй, улстөрийн карьерийг нь цэглэх хэрэгтэй.

Тэгж байж МАН-д дараагийн 30 жил гэж ярих эрх үүснэ. Тэгж байж МАН УИХ-ын 2024 оны сонгуулийн дараа баярлах эрхтэй болно.