Иргэдэд ажиллаж, амьдрах таатай орчин бүрдүүлэхээр Хотын стандартыг батлан хэрэгжүүлж буй. Тэгвэл эдгээр стандартад хөгжлийн бэрхшээлтэй иргэдэд ээлтэй орчин бүрдүүлэхийн тулд хотын 19 стандартад хөгжлийн бэрхшээлтэй иргэдэд нийгмийн хүртээмжийг нэмэгдүүлэх чиглэлээр холбогдох заалтуудыг тусгажээ.

Мөн хөгжлийн бэрхшээлтэй иргэд нийтийн тээврээр болон явган зорчиход зориулан зарим арга хэмжээг авч хэрэгжүүлж байгаа аж. Тухайлбал нийслэлийн нийтийн тээврийн парк шинэчлэлийн хүрээнд оруулж ирж буй автобуснууд хөгжлийн бэрхшээлтэй иргэдэд таатай зорчих нөхцөл бүрдүүлсэн. Зун, намар орж ирэх автобуснууд бүгд стандартын шаардлага бүрэн хангасан байна. Мөн энэ хүрээнд автобусны жолооч нарт хөгжлийн бэрхшээлтэй иргэдэд хэрхэн үйлчлэх талаар нэгдсэн сургалт явуулах аж. Түүнчлэн нийтийн эзэмшлийн зам, талбайг засаж шинэчлэхдээ хөгжлийн бэрхшээлтэй иргэдэд ээлтэй болгохоор зорьж буй юм.