Эрүүгийн цагдаагийн газрын Эдийн засгийн гэмт хэрэгтэй тэмцэх газрынхан өчигдөр “Эрдэм транс” ХХК-ийн захирал Я.Эрдэмбилэг, гүйцэтгэх захирал Д.Хатанбаатар нарын албан өрөөнд нэгжлэг хийсэн. Тус компани “Нийслэлийн түгжрэлийг бууруулах багц ажил”-ын хүрээнд Нийслэлтэй гэрээ байгуулж Солонгос улсаас 135 автобус оруулан ирж улсын төсвөөс маш их хэмжээний санхүүжилт авчээ.

Гэтэл Я.Эрдэмбилэг, Д.Хатанбаатар нар оруулж ирсэн 135 автобусныхаа он сар болон арлын дугаарыг нь засч улсад их хэмжээний хохирол учруулсан тул ЭЦГ-ын ЭЗГХТГ-ынхан албан өрөөнд нь нэгжлэг хийж хэд хэдэн нотлох баримтыг цуглуулжээ.

Өөрөөр хэлбэл, Я.Эрдэмбилэг, Д.Хатанбаатар нар татвар төлөгчдийн мөнгөөр БНСУ-д актлагдсан хуучин автобуснуудыг оруулж ирээд улсын төсвөөс маш их хэмжээний мөнгө авсан гэсэн үг. Тиймээс дээрх хоёр захиралд эрүүгийн хэрэг үүсгэж тэднийг цагдан хорих тухай хэдийнэ яригдаад эхэлж.

Учир нь тэд оруулж ирсэн 135 автобуснуудааийнхүү цаасан дээр цоо шинэ автобус  болгон хуурамч баримт үйлдээд Авто тээврийн Үндэсний төв болон Нийтийн тээврийн газарт бүртгүүлсэн. Энэ нь тэднийг цагдан хорьж, шалгах хангалттай үндэслэл гэж үзсэн  байна.