Засгийн газрын өчигдрийн хуралдааны дараа холбогдох сайдууд өөрсдийн чиглэлээр мэдээлэл хийсэн. Тэгвэл

ХХААХҮ-ийн сайд Х.Болорчулуун өнөөх л “Үхрийн ээмэг”-ний асуудлаа ярьсан нь олны дургүйцлийг дахин төрүүлэв.  Тэрбээр Засгийн газрын өчигдрийн хуралдааны дараа энэ асуудлыг цухас ярьсан.  

Анх "5.5 сая үхрийг 13 тэрбум төгрөгөөр ээмэгжүүлнэ” гээд олны эсэргүүцэлтэй тулгарч байсан ч тэгсхийгээд төсөв мөнгө байхгүй, ийм үрэлгэн зардлыг хасна татна, танана гээд таг чиг болоод байсан.

Тэгвэл ирэх оны төсөвт үхэр ээмэгжүүлэхэд зориулж 4 тэрбум төгрөг төсөвлөх юм байх. Мөн 5-6 аймгийг эрүүл бүс болгож цаашид  мал махаа гаргах юм гэнэ. Махаа экспортод гаргаад эхэлбэл түүн шиг сайхан юм хаа байх билээ.

Харин үхрээ ээмэгжүүлнэ гэхээр нэг л сэтгэлд бууж өгөхгүй байгаа юм. Уг нь  мал сүргээ ээмэгжүүлж  бүртгэлжүүлж гэмээнэ хүнсний аюулгүй байдлын баталгааг хангахад чухал ач холбогдолтой ч энэ чухал ажлыг нэг л муйхар аргаар хийх гээд байгаа нь олны дургүйг хүргээд байгаа юм.

Сайдын хэлж буйгаар бол хэдэн үхэрт ээмэг зүүчихээр  халдварт өвчин арилж  “Эрүүл бүс” болчих юм шиг тун ч амархан юм ярьж буй.

Тэгвэл татвар төлөгчид үүнийг эсэргүүцэж байгаа. Гэхдээ мэдэхгүйдээ эсэргүүцээд байгаа юм биш. Мал бол хувийн өмч. Хүний хувийн өмчийг ийнхүү төрөөс, татвар төлөгчдийн мөнгөөр ээмэгжүүлэх шийдвэр гаргаснаар малчид төр засгийн гарыг харж сурна. Нөгөөтэйгүүр ирэх сонгуульд малчдын санал авах арга гэж харагдаж буй учраас булт олон дургүй байгаа хэрэг.

Товчхондоо бол төрийн дэмжлэгээр бэлчээрийн маллагаатай үхэр сүрэгт ээмэг зүүж ийнхүү хавтгайруулвал малчид тэрхүү ээмгийг харж хамгаалах нь юу л бол. Харин малчин үхэртээ өөрөө ээмэг зүүчихвэл ёстой нүдний цэцгий мэт хайрлах нь тодорхой.

Тиймээс үхэрт ээмэг зүүж байхаар  2-3 цэцэрлэг барьчихвал  цэцэрлэгийн хаалганы цаана үлдсэн, гэртээ цоожтой үлдэж буй бяцхан нөхдөд тун ч их хэрэгтэй юм шүү дээ. Тиймээс л хүнээ хайрлах уу, үхрээ хайрлах уу...? гэж төр засгийнхнаас асуугаад байгаа юм.