Монголчуудын ой санамж гуравхан хоногийн л хүчинтэй гэж үү? Хэдийгээр олон нийт өөрсдийгөө сенсацийг сенсациар дардаг аргыг мэддэг болчихсон гэж дүгнэж байж болох ч бид загасны ой санамжтай хэвээрээ л байна.

Үүнийг өнгөрсөн долоо хоногт болсон “Нүүрсний” гэх хэргийн шүүх хурал улам баталж өглөө. Учир нь бид 2022 оны өвөл л нүүрсний хулгайчдын эсрэг дайн зарлаж, төв талбайдаа хонон өнжин жагссан. Олон өдөр хамтдаа жагсаж чадсан ч эцсийг нь үзэхгүй бол тэмцэж яана. Аль эсвэл бид их наядын хулгайд дөжирч эхэлж байгаа нь энэ үү. Ингэж хэлэхийн учир нь есдүгээр сарын 12-нд болсон шүүх хуралд олон нийт анхаарлаа хандуулаагүйн дээр танхимд гүйж явсан гэх хулгананд л санаа нь чилээрхсэн бололтой. Мөн өөр нэг сенсацид шүүх хурал дарагдав.

Хэдийгээр гурван сайхан үртэй бүсгүйн асуудал хөндөх ёстой сэдэв мөн боловч нэг сенсациар нөгөө сенсаци дарагдах учиргүй. Иргэд мэдээллийг тэнцвэртэй хүлээж авч, аль алинд нь анхаарлаа хандуулж, мэдээлэлд цензуртэй хандаж сурах хэрэгтэй байна. Эс бөгөөс бид улс төрчдийн арганд орж, “ЖДҮ”, ”Хөгжлийн банк”, “Нүүрсний хэрэг” гхулгайчдаа дахин өөдөө дээшээ гарахад нь дэмнэж өгч мэдэхээр л байгаа учраас үүнийг мартаж болохгүй.