Монгол Улсын Ерөнхийлөгч У.Хүрэлсүх  Бүгд Найрамдах Куба Улсад тус улсын ерөнхийлөгчийн урилгаар айлчилж, 77-гийн бүлэгийн дээд хэмжээний уулзалтад оролцсон нь Монгол Улсын ач холбогдол хөгжиж буй орнуудын дунд өсөж байгааг илтгэж байна.

Энэ удаагийн 77-гийн бүлгийн уулзалт “хөгжлийн хөшүүрэг: шинжлэх ухаан, технологи, инновац” сэдэв дор зохион байгуулагдсан бөгөөд Монгол Улсын хувьд энэ чиглэлд бодлогын түвшинд анхаарч ажиллаж байгаа гэдгээрээ онцлогтой. Үүнд төрийн олон үйлчилгээг цахимжуулсан Emongolia төслийг нэрлэж болох юм. Мөн Цахим хөгжлийн яам байгуулан, дижитал шилжилтэд анхаарал хандуулж байгаагаараа манай улс хөгжиж буй орнуудын хараанд өртөж буйг албаны эх сурвалжууд хэлж байна.

Тухайлбал зарим орны төлөөлөл манай улстай цахим хөгжлийн чиглэлд туршлага солилцох санал тавьсан гэх мэдээлэл бий. Ийнхүү 77-гийн бүлгийн 134 орноос Монгол Улс цахим хөгжлийн индексээрээ эхний 15-д жагсдаг зэргээс харвал манай улс энэ чиглэлээр үлгэр жишээ болж буй.

Түүнчлэн цар тахлын улмаас тасалдаад байсан 77-гийн бүлгийн энэ удаагийн уулзалтыг сурвалжлахаар дэлхийн олон орны хэвлэл мэдээллийн хэрэгслүүд хүрэлцэн ирсэн бөгөөд үүний дунд өндөр хөгжсөн Франц, Канад зэрэг орны хэвлэлүүд ч багтаж байв. Товчхондоо бол ач холбогдол нь өсөн нэмэгдэж буй 77-гийн бүлэгт Монгол Улсын байр суурь нэгэнтээ батжиж чаджээ.